呢幾排成日返工塞車，坐骨神經線又發作。一番到去已經好燥好mung。仲要睇埋呢啲咁嘅症。今晚仲去埋公司聖誕派對，想死。😵
1. 大學生，男。琴晚半夜肚痾一次咁多。今朝返到學因爲要做Presentation。PM唔想返工，4PM過黎攞假紙。摸肚又唔痛，又要話俾我聽你返到學，戲又唔做，我點幫你？
2. 大學生，女。9AM 話頭暈唔想返學。問佢點暈跟住佢就食咗誠實豆沙包話其實好眼訓就真。我話我都係，我D姑娘都係。咁我有咩幫到你？佢就話佢想嘔。我話係好多氣頂住定係真係暈車浪大肚婆嗰啲想嘔？誠實豆沙包又發威，佢話其實係因為琴日食滯咗所以飽到而家。咁我點出張假紙俾你呢？
3. 少女。話呢半年久唔久個肚有啲痛。問完曬做完曬檢查，佢話今日想攞假紙。我話你今日唔痛，唔係入黎見過下醫生就循例可以攞假紙。難道你痛左半年，就要放足半年假？
4. 20幾歲打工仔，男。話每日蒲到兩三點凌晨。周末可以嘅話就瞓到黃朝百晏。佢話依家夜晚想早啲瞓就瞓唔着。想叫我開鎮靜劑俾佢瞓覺。個個都想走捷徑。一瞓唔到就食鎮定劑呢個世界死得囉。最咪同佢講左一輪道理，睡眠衛生呀等等，一粒藥都冇開俾佢就叫佢走。
～～
我間公司好騎呢。人哋公司抽奬可以有iPhone、iPad、澳門來回船飛、家庭電器等等。我間公司好得意架。禾稈草頭髮嘅人妖Manager會去萬寧買大大小小嘅垃圾，仲要叫萬寧姐姐仔每份幫佢包。奬品嘅名單係有蒸氣眼膜，卸妝棉，公仔麵六包， Tempo紙巾唔知係18定24包，M&M朱古力，潤唇膏，大奬係XO醬禮盒等等。有圖有真相。年年都係咁樣樣。記得有一年個男醫生抽到蒸氣眼膜，佢好似最尾冇攞走。每年人妖經理仲會抽奬之前好大聲問：「你哋係咪等抽奬等左好耐呢？」你叫人點答佢姐？
#其實我覺得公仔麵好過潤唇膏囉起碼可以食
Search